Linji Gwida dwar l-Imġiba

L-Ewwel Verżjoni

Data: April 2026

Werrej

• 1. Daħla: Manswetudni u Umiltà
• 2. Għanijiet
• 3. X’inhu mistenni mill-imġiba
• 3.1 Puntwalità u Attendenza
• 3.2 Dehra u Uniformi
• 3.3 Imġiba u Rispett
• 3.4 Xogħol Akkademiku u Xogħol għad-Dar
• 3.5 Użu ta’ Apparat Teknoloġiku
• 3.6 Ħarsien tal-Proprjetà u tal-Ambjent
• 4. Sistema ta’ Immaniġġjar u Rappurtaġġ tal-Imġiba
• 4.1 Kif tiġi indirizzata l-imġiba negattiva
• 4.2 Premju għall-Imġiba Pożittiva
• 5. Komunikazzjoni mal-Ġenituri
• 6. Reviżjoni u Monitoraġġ

1. Daħla: Manswetudni u Umiltà

Fl-Iskola Saint Michael, id-dixxiplina hija frott l-imħabba, il-manswetudni u l-umiltà.

L-istrateġija tagħna dwar l-imġiba għandha l-għeruq tagħha fit-tagħlim ta’ Ġesù Kristu u huwa ispirat mill-ispiritwalità ta’ San Ġorġ Preca u tas-Soċjetà tad-Duttrina Nisranija (M.U.S.E.U.M.).

Aħna nemmnu li kull student huwa bin Alla, denju ta’ rispett u dinjità.

Id-dixxiplina mhijiex kastig; hija formazzjoni. Tgħin lill-istudenti tagħna jikbru fl-għerf, fir-responsabbiltà u fl-awtokontroll, u tħejjihom biex ikunu membri attivi u ħanina tas-soċjetà.

2. Għanijiet

Dawn il-linji gwida għandhom l-għan li:

• irawmu ambjent san, sigur, ordinat għat-tagħlim.
• isaħħu r-responsabbiltà, ir-rispett u d-dixxiplina ta’ kull individwu.
• jippromwovu l-valuri tal-Evanġelju bħalma huma l-maħfra, it-tjieba u r-rikonċiljazzjoni.
• jappoġġjaw lill-istudenti fl-iżvilupp tal-empatija u l-ġudizzju morali biex kull individwu jagħraf bejn dak li hu tajjeb u dak li hu ħażin.
• jiżguraw ġustizzja u konsistenza permezz ta’ sistema trasparenti ta’ rappurtar, premjijiet u konsegwenzi.

Dawn il-linji gwida japplikaw għall-membri kollha tal-komunità tal-iskola u tkopri l-imġiba kemm ġewwa kif ukoll barra l-bini tal-iskola, kull meta student ikun qed jirrappreżenta lill-Iskola Saint Michael.

3. X’inhu mistenni mill-imġiba

L-aspettattivi dwar l-imġiba jirriflettu kemm l-ethos tagħna kif ukoll l-impenn tagħna lejn l-eċċellenza f’dak li hu akkademiku u l-ġid tal-komunità. Il-linji gwida li ġejjin għandhom jiġu segwiti sabiex jiġi żgurat ambjent sigur biex fih isir it-tagħlim.

3.1 Puntwalità u Attendenza

• L-attendenza fl-iskola hija obbligatorja kuljum, skont il-kalendarju skolastiku, inkluż dawk il-ġranet fejn ma jsirx tagħlim formali fil-klassi. Dawn l-attivitajiet huma obbligatorji.
• Malli l-istudent jasal l-iskola, għandu jidħol minnufih fl-iskola u jirreġistra l-attendenza tiegħu permezz tal-karta SMID fil-magni elettroniċi apposta li jinsabu fid-daħla tal-iskola.
• L-istudenti kollha huma mistennija jkunu preżenti għall-assembly tal-iskola, li tibda fit-7.50 a.m. Il-lezzjonijiet jibdew fit-8.00 a.m.
• L-istudenti huma mistennija jkunu fil-klassi fil-bidu ta’ kull lezzjoni u mhux aktar tard minn tliet minuti wara li ddoqq il-qanpiena, skont l-orarju. L-attendenza tittieħed fil-bidu ta’ kull lezzjoni. Studenti li jidħlu fil-klassi wara ħames minuti jiġu mmarkati bħala tard u jingħataw rapport ta’ mġiba negattiva, sakemm ma tiġix ippreżentata lill-għalliem, raġuni bil-miktub għala waslu tard.
• L-istudenti li jaslu kmieni ħafna, għandhom jibqgħu dejjem fiż-żoni magħżula apposta fejn ikunu ssorveljati mill-edukaturi. Żoni oħra tal-iskola m’għandhomx jintużaw sakemm ma jingħatawx struzzjonijiet mod ieħor.

3.2 Dehra u Uniformi

L-istudenti għandhom jilbsu l-uniformi tal-iskola fil-jiem kollha tal-iskola. L-uniformi tal-iskola tikkonsisti f’dan li ġej:

• Flokk (polo shirt) abjad bil-kmiem twal jew qosra bil-logo tal-iskola.
• Qalziet twil jew qasir kannella ċar.
• Ġakketta blu skur biż-żipp bil-logo tal-iskola.
• Ġakketta tax-xita blu skur bil-logo tal-iskola.
• Kalzetti kannella ċar/bojod.
• Żraben sportivi bojod.

Fil-jiem meta l-istudenti jkollhom lezzjonijiet tal-Edukazzjoni Fiżika, huma mistennija jilbsu t-tracksuit tal-iskola, li tikkonsisti f’dan li ġej:

• Qalziet tat-tracksuit blu skur bi strixxa safra.
• T-shirt ikkulurit bil-logos tal-iskola u tad-dar (il-kulur jirreferi għall-House li l-istudent jagħmel parti minnha: tal-Feniċi: blu; tan-Normanni: aħdar; tal-Kavallieri: iswed; tar-Rumani: aħmar).
• Ġakketta tat-tracksuit blu ċar biż-żipp bil-logo tal-iskola.
• Żraben sportivi u kalzetti b’kuluri newtrali (iswed, blu jew abjad).

Waqt ħarġiet tal-iskola, l-istudenti għandhom isegwu l-istruzzjonijiet tal-għalliema dwar l-ilbies. Meta l-istudenti jkunu meħtieġa jilbsu l-kit tal-Edukazzjoni Fiżika, għandhom jilbsu t-T-shirt griż tal-Edukazzjoni Fiżika u mhux it-T-shirt ikkulurit (tal-House).

Ix-xagħar u l-leħja għandhom jinżammu nodfa u puliti. Żebgħa tax-xagħar, disinji fix-xagħar jew marki (daqqiet bil-magna) fil-ħuġbejn huma strettament ipprojbiti.

Għal raġunijiet ta’ sigurtà, dehbijiet ta’ kull tip, inklużi ġiżirajjen, imsielet, brazzuletti u ċrieket, mhumiex permessi, ħlief ġiżirajjen jew brazzuletti mediċi. Arloġġi, inklużi smartwatches, ma jistgħux jintlibsu waqt testijiet u/jew eżamijiet.

Kull student li ma jimxix ma’ dawn ir-regolamenti jiġi rrappurtat, jista’ jiġi ristrett milli jattendi lezzjonijiet jew attivitajiet u jista’ jintbagħat id-dar u jibqa’ hemm għal perjodu ta’ żmien determinat.

3.3 Imġiba u Rispett

L-iskola tagħna tippromwovi u trawwem imġiba pożittiva u rispett fost il-membri kollha tal-komunità u lejn il-proprjetà tal-iskola. Sabiex jiġi żgurat li dawn il-valuri jinżammu, l-istudenti huma mistennija li:

• Jittrattaw lill-membri kollha tal-istaff (SLT, għalliema, LSEs, segretarji tal-iskola, cleaners) bir-rispett dovut billi jindirizzawhom b’mod xieraq, jużaw “Sir” jew “Ms”, segwit mill-isem jew il-kunjom skont kif jippreferi l-persuna indirizzata.
• Jikkomunikaw mal-istaff permezz tal-mezzi xierqa. L-istudenti għandhom jużaw Teams u/jew MySchool, filwaqt li l-ġenituri/kustodji għandhom jużaw l-email jew jikkomunikaw bit-telefon.
• Jżommu limiti xierqa fir-rigward tar-relazzjoni tagħhom mal-membri tal-istaff u ma’ sħabhom, kemm fl-iskola u kif ukoll fil-komunikazzjoni online.
• Jittrattaw lill-istudenti kollha b’mod ugwali, inklużi studenti b’diżabiltajiet jew bżonnijiet speċjali. L-iskola għandha regola ta’ tolleranza żero lejn bullying ta’ kull tip. Għal aktar informazzjoni għandha ssir referenza għal-Linji Gwida Kontra l-Bullying.
• Iżommu ambjent ta’ ħbiberija u pożittività. Laqmijiet dispreġġjattivi u ġlied mhumiex permessi. Il-kunflitti għandhom jiġu solvuti b’mod paċifiku bl-appoġġ tal-membri tal-istaff.
• Jastjenu milli jidgħu jew jużaw kliem oxxen.
• Jużaw it-taraġ u l-passaġġi xierqa meta jiċċaqalqu madwar l-iskola. Ir-rampa prinċipali tal-iskola għandha tintuża biss biex wieħed jaċċessa s-sulari t’isfel, filwaqt li t-taraġ fiż-żewġt itruf tal-kurituri għandhom jintużaw biex wieħed jaċċessa s-sulari ta’ fuq. Ir-rampa prinċipali tal-iskola tista’ tintuża biex wieħed jaċċessa s-sulari ta’ fuq biss immedjatament wara l-assembly u l-ħinijiet tal-brejk. Ġiri u għajjat fil-kurituri u fil-passaġġi mhumiex permessi.

L-oġġetti li ġejjin huma strettament ipprojbiti fl-iskola:

• Alkoħol, xorb enerġetiku jew soft drinks. Il-ġenituri huma mfakkra li l-ikel tal-iskola għandu jkun skont il-Politika Nazzjonali dwar l-Ikel u n-Nutrizzjoni.
• Prodotti tat-tabakk u/jew sigaretti elettroniċi/vapes.
• Lighters tas-sigaretti.
• Drogi ta’ kull tip (ħlief mediċini).
• Skieken jew oġġetti li jaqtgħu, jew oġġetti li jistgħu jikkawżaw ħsara fiżika .
• Armi tan-nar ta’ kull tip (inklużi imitazzjonijiet).

Il-membri tal-SLT jirriżervaw id-dritt li jwettqu tfittxijiet fil-basktijiet skont id-diskrezzjoni tagħhom.

3.4 Xogħol Akkademiku u Xogħol għad-Dar

L-aspett akkademiku tal-ħajja tal-iskola huwa wieħed mill-pilastri essenzjali tal-komunità tal-iskola. Għalhekk, hija r-responsabbiltà ta’ kull student li jwettaq ix-xogħol akkademiku mogħti lilu b’diliġenza u fil-ħin. Dan jinkludi xogħol mogħti biex isir waqt il-lezzjonijiet, kif ukoll xogħol mogħti għad-dar.

Kull student huwa mistenni li:

• Jżomm rekord tax-xogħol mogħti billi jikteb fid-djarju tal-iskola u jidħol regolarment fuq Teams u MySchool, speċjalment meta l-istudent ikun assenti mill-klassi.
• Jagħmel l-almu tiegħu biex jagħmel xogħol ta’ livell skont kif mitlub u skont l-aħjar tal-abbiltajiet tiegħu.
• Jissottometti x-xogħol mogħti sad-data stipulate mill-għalliema.
• Jistinka biex jitjieb meta jingħata feedback dwar ix-xogħol sottomess.
• Jagħmel l-aħjar użu mill-ħin. Waqt lezzjonijiet, fejn l-għalliema ma jattendux (free lessons) l-istudenti għandhom jagħmlu xogħol akkademiku, bħax-xogħol għad-dar, jaqraw jew jaħdmu fuq proġetti mogħtija, skont kif jingħataw struzzjoni mill-għalliem/a preżenti.

Studenti li jiksbu riżultati adegwati fix-xogħol akkademiku tagħhom jiġu ppremjati b’rapporti pożittivi u b’ċelebrazzjoni tas-suċċess tagħhom.

Studenti li ma jurux sforz biżżejjed (bħal meta jissottomettu xogħol ta’ livell baxx, traskurat jew wara d-data miftiehma) jiġu rrappurtati lill-amministrazzjoni tal-iskola. Jekk ikun meħtieġ, jingħata appoġġ xieraq b’kollaborazzjoni mal-ġenituri/kustodji, il-mentors tal-klassi, l-għalliema tal-guidance u professjonisti esterni jekk is-sitwazzjoni teskala.

3.5 Użu ta’ Apparat Teknoloġiku

Filwaqt li nirrikonoxxu l-importanza u l-utilità tat-teknoloġija fil-proċess tat-tagħlim, użu mhux xieraq ta’ apparat teknoloġiku jista’ jfixkel kemm il-proċess edukattiv kif ukoll il-ħajja tal-komunità. Għalhekk:

• L-użu ta’ apparat mobbli huwa strettament ipprojbit waqt il-ħinijiet tal-iskola. Studenti li jkollhom bżonn iġibu apparat mobbli l-iskola minħabba ċirkostanzi eċċezzjonali għandhom jitfuh u jqegħduh f’post skont kif mitlub mill-amministrazzjoni. Il-ġenituri/kustodji għandhom jitolbu l-permess tal-Viċi Kap rispettiv, mill-inqas ġurnata qabel. Studenti li jġibu l-mowbajl tagħhom mingħajr il-permess tal-Viċi Kap ikollhom l-apparat ikkonfiskat u jingħata lura biss lill-kustodju/i tal-istudent.
• Laptops ipprovduti mill-iskola għandhom jintużaw b’mod responsabbli. Il-linji gwida għall-użu tagħhom huma mniżżla fil-Politika dwar l-Użu tal-Laptop.

3.6 Ħarsien tal-Proprjetà u tal-Ambjent

Il-ħarsien tal-proprjetà tal-iskola huwa responsabbiltà ta’ kulħadd. Kull sena, l-iskola tinvesti fit-tiġdid u fit-tisbiħ sabiex tiżgura li l-ambjent jibqa’ jilqa’ lill-istudenti u jkun tajjeb għat-tagħlim. L-istudenti mhumiex permessi jidħlu fil-klassi mingħajr permess, speċjalment jekk ma jkunx hemm għalliem/a, sakemm ma jingħatawx struzzjoni speċifika minn membru tal-SLT.

L-istudenti huma mistennija li:

• Jużaw il-proprjetà tal-iskola b’mod responsabbli. L-imwejjed u s-siġġijiet għandhom jinżammu nodfa u fl-ordni.
• Jastjenu milli jieklu jew jixorbu fil-laboratorji. Il-konsum tal-ikel mhuwiex permess fil-klassi sakemm ma jingħatax permess mill-għalliem f’ċirkostanzi eċċezzjonali.
• Jarmu l-iskart fil-bins xierqa.
• Iżommu t-toilets nodfa f’kull ħin b’rispett lejn il-komunità tal-iskola.
• Jużaw smartboards, projectors u monitors biss meta jingħataw struzzjoni mill-edukaturi.
• Jużaw it-tagħmir sportiv b’mod responsabbli u jiħduh lura f’postu fejn ikun merfugħ.

Kull ħsara lill-proprjetà tal-iskola għandha tiġi rrappurtata minnufih. L-istudenti jintalbu jħallsu għall-ħsarat ikkawżati intenzjonalment jew minħabba traskuraġni.

L-istudenti huma responsabbli għall-affarijiet personali tagħhom. Lockers huma pprovduti biex jintrefgħu oġġetti li ma jkunux meħtieġa matul il-jum tal-iskola, u huwa rrakkomandat b’saħħa li oġġetti ta’ valur ma jinġibux l-iskola.

4. Sistema ta’ Immaniġġjar u Rappurtaġġ tal-Imġiba

L-għanijiet ta’ din is-sistema ta’ immaniġġjar tal-imġiba huma li tiżgura konsistenza, trasparenza u ġustizzja. Ir-rapporti huma maħsuba biex jinfurmaw, jappoġġjaw, ifaħħru u jiċċelebraw l-imġiba tal-istudenti, u mhux sempliċement biex jikkastigaw. Għalhekk kemm imġiba pożittiva kif ukoll negattiva tiġi rreġistrata fis-sistema ta’ rappurtaġġ.

Japplikaw il-linji gwida li ġejjin:

• Kull inċident jew kisba għandu/ha jiġi/tiġi rreġistrat/a fi żmien tlett ijiem skolastiċi.
• Ir-rapporti jiddaħħlu permezz tas-sistema online ta’ rappurtaġġ tal-iskola bl-użu ta’ kategoriji u punti standardizzati.
• Il-membri tal-istaff huma mfakkra biex jevitaw trattament preferenzjali u huma mħeġġa jikkollaboraw sabiex tiġi żgurata l-konsistenza.
• Il-ġenituri jiġu nnotifikati awtomatikament meta jiġi rreġistrat rapport pożittiv jew negattiv.
• Il-mentors tal-klassi jsegwu l-istudenti, u joffru gwida u appoġġ pastorali.

4.1 Kif tiġi indirizzata l-imġiba negattiva

• Rapporti negattivi jikkorrispondu għal ksur tar-regolamenti mniżżla f’dawn il-linji gwida.
• Mal-ewwel ksur, tingħata twissija bil-kliem, li tistieden lill-istudent jirrifletti fuq l-azzjonijiet tiegħu u l-konsegwenzi tagħhom.
• Imġiba ripetuta tiġu rreġistrata fis-sistema ta’ rappurtaġġ. Numru speċifiku ta’ punti tal-imġiba jitnaqqas għal kull inċident irrappurtat. Rapporti akkumulati jiġu riveduti regolarment mill-mentors tal-klassi u mit-Tim Amministrattiv tal-Iskola (SLT).
• Meta student jingħata ħames (5) rapporti negattivi, l-SLT jivvaluta l-imġiba u l-attitudni tal-istudent u tista’ titqies waħda jew aktar minn dawn il-konsegwenzi:
  • L-istudent ikun meħtieġ jibqa’ l-iskola għal siegħa wara l-ħin tal-iskola. Dan jiġi ripetut għal kull ħames (5) rapporti negattivi addizzjonali.
  • Jista’ jiġi kkunsidrat sospensjoni temporanja minn attivitajiet barra mill-klassi (live-ins, ħarġiet, rappreżentanza tal-iskola fl-isport jew f’attivitajiet nazzjonali).
  • Il-mentors tal-klassi jaħdmu direttament mal-istudent biex jevalwaw il-bżonnijiet ta’ appoġġ u jistgħu jirreferu l-każ lill-Viċi Kap rispettiv. Fejn ikun meħtieġ, jistgħu jiġu involuti servizzi esterni ta’ appoġġ permezz tat-tim psikosoċjali.
• Jekk l-interventi jonqsu milli jwasslu għal titjib u l-ksur ikompli, jitlaqqa’ bord dixxiplinarju ad hoc. Dan il-bord ikun magħmul minn membru wieħed tal-Bord tad-Diretturi, il-Kap tal-Iskola, il-Viċi Kap responsabbli mis-sena (year group) partikolari, u l-mentor tal-klassi. Il-bord jista’ jiddeċiedi li jissospendi jew jeskludi lill-istudent mill-iskola.
• Il-membri tal-SLT jistgħu jiġu kkuntattjati fi kwalunkwe stadju jekk tkun meħtieġa attenzjoni immedjata.
• L-SLT għandu jiġi infurmat minnufih f’każijiet li jinvolvu:
  • Aggressjoni fiżika jew verbali.
  • Bullying, inkluż cyberbullying.
  • Tħassib dwar safeguarding.
  • Serq jew vandaliżmu.
  • Diżubbidjenza persistenti.
  • Pussess jew użu ta’ oġġetti jew sustanzi pprojbiti.
  • Ksur tal-protezzjoni tad-data.
  • Nuqqas serju ta’ rispett lejn l-awtorità.
• L-istudenti jistgħu wkoll ikunu meħtieġa jattendu programmi apposta mħejjija mill-professjonisti tal-iskola. Dawn il-programmi għandhom l-għan li jgħinu lill-istudenti jirriflettu fuq l-azzjonijiet tagħhom u jaħdmu biex jilħqu għanijiet miftiehma, fi żmien stabbilit.

4.2 Premju għall-Imġiba Pożittiva

Jistgħu jingħataw punti pożittivi għal:

• Atti ta’ tjieba/ħniena u servizz.
• Rispett lejn l-istaff u lejn sħabhom.
• Meta tittieħed inizjattiva.
• Sforz akkademiku u titjib.
• Imġiba pożittiva konsistenti.
• Kwalunkwe raġuni oħra meqjusa xierqa mill-membri tal-istaff.

Imġiba pożittiva tiġi rreġistrata fis-sistema ta’ rappurtaġġ. Meta jkun xieraq, l-SLT jiġi infurmat sabiex l-isforzi tal-istudenti jiġu rikonoxxuti kif jixraq.

Rapporti pożittivi jakkumulaw matul ix-xhur tal-iskola u jiġu rikonoxxuti kif ġej:

• Ċertifikat tal-Bronż għall-Imġiba.
• Ċertifikat tal-Fidda għall-Imġiba.
• Ċertifikat tad-Deheb għall-Imġiba.
• Ċertifikat tal-Platinu għall-Imġiba.

Fi tmiem kull term, studenti bl-ogħla ammont ta’ punti pożittivi jingħataw rikonoxximent.

Fi tmiem is-sena akkademika, studenti bl-inqas ammont ta’ punti negattivi jiġu mistiedna jieħdu sehem f’attività speċjali organizzata skont is-sena.

5. Komunikazzjoni mal-Ġenituri

Il-ġenituri huma parti integrali mill-komunità tal-iskola u għandhom rwol essenzjali fl-implimentazzjoni ta’ dawn il-linji gwida.

Il-ġenituri huma mistennija jaqraw dawn il-linji gwida b’attenzjoni u jiżguraw li jifhmu l-implikazzjonijiet kollha tagħha. Huma mħeġġa wkoll jiddiskutuha ma’ wliedhom sabiex jiżguraw għarfien tal-aspettattivi u r-regolamenti.

Il-ġenituri jirċievu notifiki awtomatiċi bl-email għal kull rapport pożittiv u negattiv. F’każijiet ta’ ksur serju jew ripetut, il-ġenituri jistgħu jkunu meħtieġa jiltaqgħu ma’ membri tal-SLT sabiex jiġi determinat l-aħjar kors ta’ azzjoni.

6. Reviżjoni u Monitoraġġ

Dawn il-linji gwida jiġu riveduti kull sena mill-SLT b’konsultazzjoni mal-istaff u mar-rappreżentanti tal-istudenti.

Data dwar l-imġiba, inklużi rapporti, premjijiet u sospensjonijiet, tiġi analizzata kull term sabiex jiġu identifikati xejriet u jiġu kkomunikati l-interventi neċessarji.

Żvilupp professjonali kontinwu jappoġġja lill-istaff fi strateġiji ta’ kura pastorali lejn l-imġiba.