ST MICHAEL SCHOOL

POLITIKA KONTRA L-BULLYING

Ġunju 2026

Verżjoni bil-Malti

Politika Kontra l-Bullying tal-Iskola St Michael

Għanijiet

Fl-Iskola St Michael nemmnu li kull individwu hu maħluq b’dinjità u b’valur fih innifsu, kif jirrifletti l-ethos (karattru) Kattoliku tagħna u kif ispirat mill-valuri tal-Evanġelju. Il-bullying, fi kwalunkwe forma, huwa ksur ta’ din id-dinjità u jdgħajjef l-ambjent inklussiv, ta’ kura u ta’ rispett li nfittxu li nrawmu. Il-Politika tagħna Kontra l-Bullying tenfasizza approċċ ta’ tolleranza żero lejn il-bullying. Din il-Politika tadotta wkoll prattiċi li jgħinu biex tissewwa l-ħsara li tkun saret u terġa’ tibni l-fiduċja u tippromwovi r-rikonċiljazzjoni.

B’konformità mal-Qafas Respect for All (MEDE, 2014), din il-politika tagħraf l-importanza li:

• tagħti s-setgħa lill-istudenti, lill-istaff u lill-ġenituri biex jidentifikaw u jindirizzaw b’mod effettiv imġiba ta’ bullying;
• trawwem kultura ta’ rispett, empatija u relazzjonijiet interpersonali pożittivi;
• tiżgura ambjent sigur u li jrawwem it-tkabbir, fejn kull individwu jista’ jikber b’mod ħolistiku mingħajr biża’ ta’ diskriminazzjoni, fastidju jew aggressjoni.

Prinċipji

Fl-impenn tagħha biex tipprevjeni u tindirizza l-bullying, l-Iskola St Michael hija mmexxija minn dawn il-prinċipji:

1. Politika ta’ Tolleranza Żero: Il-bullying fi kwalunkwe forma – fiżiku, verbali, soċjali, preġudizzjali, sesswali jew cyber – mhuwiex ittollerat. L-iskola tagħraf li mġibiet bħal dawn jiksru d-dinjità tal-individwi u jħallu effetti fit-tul fuq il-benesseri fiżiku, psikoloġiku, soċjali u edukattiv tagħhom.

2. Rispett għad-Dinjità tal-Individwu: Kull membru tal-komunità skolastika għandu d-dritt li jiġi trattat b’rispett u li jitgħallem jew jaħdem f’ambjent ħieles mill-biża’, mid-diskriminazzjoni u mill-ostilità.

3. Tkabbir Ħolistiku: L-Iskola St Michael hija impenjata li trawwem l-iżvilupp ħolistiku ta’ kull student, filwaqt li tiżgura li l-ħtiġijiet personali, soċjali u emozzjonali jiġu indirizzati flimkien mal-progress akkademiku.

4. Intervent Bikri: L-iskola tagħti prijorità lill-identifikazzjoni bikrija ta’ mġibiet ta’ bullying u għal intervent fil-ħin sabiex jiġi evitat li s-sitwazzjoni teskala jew tikkawża ħsara fit-tul.

5. Prattiċi Restawrattivi: B’konformità mal-valuri tal-Evanġelju u l-ethos tal-iskola, jiġu enfasizzati prattiċi restawrattivi biex tissewwa l-ħsara, terġa’ tinbena l-fiduċja u titrawwem ir-rikonċiljazzjoni bejn il-partijiet affettwati.

6. Komunikazzjoni Miftuħa: L-iskola trawwem kultura ta’ trasparenza u tinkoraġġixxi lill-istudenti, lill-istaff u lill-ġenituri biex jirrappurtaw inċidenti ta’ bullying mingħajr biża’ ta’ tpattija.

7. Inklużjoni u Diversità: L-iskola tiċċelebra d-diversità u tiżgura li l-individwi kollha, irrispettivament mill-isfond jew l-identità tagħhom, iħossuhom milqugħa u apprezzati fil-komunità.

8. Responsabbiltà Kollaborattiva: Il-prevenzjoni u l-indirizzar tal-bullying huma responsabbiltà maqsuma bejn l-istudenti, l-istaff, il-ġenituri u l-komunità skolastika sħiħa.

9. Allinjament mal-Politika Nazzjonali: L-azzjonijiet kollha meħuda mill-iskola jkunu skont il-Qafas Respect for All (MEDE, 2014) u skont linji gwida nazzjonali rilevanti, biex jiġu żgurati konsistenza u responsabbiltà.

10. Titjib Kontinwu: L-iskola hija impenjata li tirrevedi u taġġorna regolarment l-istrateġiji u l-prattiċi tagħha kontra l-bullying sabiex jirriflettu sfidi li jevolvu u l-aħjar prattiċi.

Azzjonijiet u Strutturi

Biex tipprevjeni u tindirizza l-bullying b’mod effettiv, l-Iskola St Michael implimentat dawn l-istrutturi u l-azzjonijiet li ġejjin:

1. Class Mentors:

• iservu bħala persuni ewlenin fil-monitoraġġ tal-benesseri tal-istudenti u fl-identifikazzjoni ta’ sinjali bikrija ta’ tbatija;
• joħolqu opportunitajiet biex l-istudenti jesprimu t-tħassib tagħhom waqt laqgħat individwali jew diskussjonijiet fi grupp.

2. Designated Safeguarding Officer (DSO) – is-Sur Massimo Farrugia:

• jirreġistra l-inċidenti kollha rrappurtati u jiżgura li tittieħed l-azzjoni xierqa;
• jagħmel riferimenti lil professjonisti esterni meta jkun meħtieġ.

3. Deputy Heads:

• imexxu l-investigazzjonijiet ta’ inċidenti rrappurtati u jikkoordinaw ir-risposti;
• jiżguraw li l-miżuri kollha jkunu konformi mar-regoli u l-ethos tal-iskola;
• jirrapportaw l-inċidenti kollha lid-Designated Safeguarding Officer (DSO), is-Sur Massimo Farrugia.

4. Kap tal-Iskola:

• iżomm sorveljanza fuq il-każijiet kollha rrappurtati u jiżgura responsabbiltà f’kull stadju.

5. Bord tad-Diretturi:

• jirrevedi u jindirizza każijiet serji li jeħtieġu azzjoni dixxiplinarja, inkluż sospensjoni jew tkeċċija f’sitwazzjonijiet estremi, fuq rakkomandazzjoni tal-Kap tal-Iskola.

6. Rappreżentanti tal-Istudenti:

• għandhom rwol fit-tisħiħ ta’ kultura ta’ rispett u inklużjoni permezz ta’ inizjattivi mmexxija mill-istudenti stess.

7. Live-ins annwali, PSCD u lezzjonijiet tar-Reliġjon:

• irawmu rispett reċiproku, empatija u fehim fost l-istudenti. Il-live-ins jipprovdu spazju ddedikat għar-riflessjoni, għall-bini ta’ grupp san bejn l-istudenti u għal diskussjonijiet dwar kwistjonijiet personali u soċjali.

Strateġiji Preventivi

1. Programmi ta’ Għarfien:

• Lezzjonijiet tal-PSCD u assemblies jiffukaw fuq kif wieħed jagħraf u jimmaniġġja mġibiet ta’ bullying.
• Xenarji ta’ role-play u attivitajiet fi grupp jintużaw biex tinbena empatija u fehim.

2. Qafas ta’ Mġiba Pożittiva:

• Jiġu mħeġġa interazzjonijiet ta’ rispett permezz ta’ sistemi ta’ premjazzjoni, bħall-għoti ta’ rikonoxximenti lill-istudenti għal atti ta’ ġentilezza u inklużjoni.

3. Strateġiji ta’ Identifikazzjoni Bikrija:

• Monitoraġġ regolari mill-Class Mentors waqt il-Communication Time.

4. Spazji Siguri:

• Jingħataw żoni sorveljati waqt il-ħinijiet tal-mistrieħ għal studenti li jkunu qed ifittxu ambjent ta’ appoġġ permezz tal-ħolqien ta’ klabbs u attivitajiet li jrawmu l-inklużjoni.

5. Involviment tal-Ġenituri:

• Jiġu organizzati workshops biex jgħinu lill-ġenituri jagħrfu s-sinjali tal-bullying u jappoġġjaw lil uliedhom b’mod effettiv. Il-ġenituri jiġu mħeġġa jieħdu sehem f’korsijiet dwar il-ħiliet tal-ġenituri organizzati minn korpi professjonali varji u promossi mill-iskola.

Mudell ta’ Intervent f’5 Fażijiet

Fażi 1: Sistema ta’ Rapportar

• Jiġu pprovduti diversi modi kif isir rapport:

• Permezz ta’ Microsoft Teams.
• Billi tintbagħat formola fuq il-pjattaforma diġitali tal-iskola.
• Rapporti anonimi permezz ta’ kaxxa apposta għar-rapporti.

• Jiġi żgurat li r-rapporti kollha jiġu rreġistrati mid-Designated Safeguarding Officer (DSO) fi żmien ġurnata tax-xogħol.

Fażi 2: Esplorazzjoni

• Isiru osservazzjonijiet u intervisti inizjali biex jiġu identifikati mudelli ta’ mġiba.
• Is-sejbiet jiġu dokumentati u jiġu ċċarati r-rwoli tal-partijiet kollha involuti.

Fażi 3: Fażi ta’ Definizzjoni

• Tinġabar l-informazzjoni dettaljata mingħand studenti, persunal u ġenituri.
• Il-ġenituri jiġu involuti fi żmien raġonevoli mir-rapport, jiġifieri fi żmien ġurnata tax-xogħol.
• Jiġu definiti n-natura u l-impatt tal-inċident.

Fażi 4: Intervent

• Jiġu implimentati strateġiji mfassla għall-każ, inklużi pjanijiet ta’ sigurtà, regoli dwar l-imġiba jew sessjonijiet ta’ medjazzjoni.
• Każijiet serji jiġu eskalati lill-Kap tal-Iskola jew lill-Bord tad-Diretturi skont il-ħtieġa.
• Każijiet serji jistgħu jwasslu għal sospensjoni jew tkeċċija, soġġetti għall-approvazzjoni tal-Bord tad-Diretturi.

Fażi 5: Fażi Preventiva

• L-inċidenti jiġu rreġistrati għal analiżi fil-futur.
• Tiġi evalwata l-effettività tal-intervent u jingħataw follow-ups.
• Strateġiji preventivi jiġu maqsuma mal-komunità skolastika.

Prattiċi Restawrattivi u Appoġġ

Fl-Iskola St Michael, il-prattiċi restawrattivi huma ċentrali fl-indirizzar ta’ inċidenti ta’ bullying. L-għan huwa li jissewwew ir-relazzjonijiet, jitrawwmu ftehim reċiproku li jwassal għall-paċi u l-partijiet kollha jerġgħu jiġu integrati fil-komunità skolastika.

Meta jiġi rrappurtat inċident, jiġi segwit il-proċess li ġej:

1. Appoġġ lill-Vittma: Tittieħed azzjoni immedjata biex tiġi żgurata s-sigurtà u l-benesseri emozzjonali tal-vittma. Jiġi offrut counselling, u t-tim pastorali jwettaq check-ins regolari biex jimmonitorja s-sitwazzjoni u jara li din qed titjieb. Il-kontribut tal-vittma jintalab fl-ippjanar tal-passi biex terġa’ tinkiseb sensazzjoni ta’ sigurtà fl-iskola.

2. Responsabbiltà għal Min Ikun Għamel il-Bullying: Il-persuna li tkun wettqet imġiba ta’ bullying tiġi ggwidata biex tirrifletti fuq l-azzjonijiet tagħha permezz ta’ diskussjonijiet strutturati. Jiġu stabbiliti regoli dwar l-imġiba, b’aspettattivi u konsegwenzi ċari. Jiġi offrut counselling biex jiġu indirizzati kawżi li setgħu waslu għal din l-imġiba.

3. Djalogu Restawrattiv: Fejn ikun xieraq, issir sessjoni medjata bejn il-vittma u min ikun għamel il-bullying. Iż-żewġ partijiet jiġu mħeġġa jesprimu s-sentimenti u l-perspettivi tagħhom. L-enfasi tkun fuq li tiġi rikonoxxuta l-ħsara, jingħataw apoloġiji u jintlaħaq ftehim dwar passi biex terġa’ tinbena l-fiduċja.

4. Involviment tal-Ġenituri: Il-ġenituri kemm tal-vittma kif ukoll ta’ min ikun għamel il-bullying jiġu involuti fil-proċess, biex jiġu żgurati t-trasparenza u approċċ magħqud lejn ir-riżoluzzjoni. Il-ġenituri jingħataw gwida dwar kif isaħħu mġibiet pożittivi fid-dar.

5. Follow-Up: Isiru follow-ups regolari biex jiġi żgurat li dak li ġie miftiehem qed jinżamm u li ż-żewġ partijiet iħossuhom appoġġjati. Il-komunità skolastika tiġi mħeġġa tibqa’ viġilanti biex jiġu evitati inċidenti oħra u biex jitrawwem ambjent pożittiv.

Reviżjoni tal-Politika u Komunikazzjoni

Reviżjoni tal-Politika

1. Reviżjoni Annwali: Issir mis-SLT, mid-DSO u mill-Bord tad-Diretturi.

2. Analiżi tal-Inċidenti: Reviżjoni bbażata fuq id-data ta’ mudelli u kwistjonijiet rikorrenti.

3. Allinjament mal-Linji Gwida: Aġġornamenti li jirriflettu standards edukattivi ġodda.

Komunikazzjoni

1. Aċċessibbiltà: Il-politika tkun disponibbli fuq is-sit tal-iskola.

2. Sessjonijiet ta’ Għarfien: Sessjonijiet annwali għall-istudenti, għall-istaff u għall-ġenituri.

3. Konferma mill-Ġenituri: Dikjarazzjoni annwali li turi li l-politika ġiet mifhuma.

4. Aġġornamenti Kontinwi: Jiġu kkomunikati permezz tal-pjattaforma diġitali tal-iskola.

5. Involviment tal-Istudenti: Assemblies u lezzjonijiet tal-PSCD.

Monitoraġġ tal-Implimentazzjoni

• Sorveljanza mid-DSO u verifiki perjodiċi mis-SLT.

Appendiċi A: Sommarju tal-Mudell f’5 Fażijiet

Appendiċi B: Formola għar-Rapport ta’ Inċident ta’ Bullying

Segretarjat għall-Edukazzjoni Kattolika

30, Binja Josmar, Idmejda Street, Balzan, BZN 1521, Malta | Tel: +356 22039360 | www.csm.edu.mt

Formola għar-Rapport ta’ Inċident ta’ Bullying

L-informazzjoni kollha pprovduta se tinżamm kunfidenzjali u tintuża biex tgħin fl-indirizzar tas-sitwazzjoni.

Taqsima 1: Informazzjoni dwar min qed jagħmel ir-rapport

1. Isem ta’ min qed jagħmel ir-rapport: _________________________________________________________________

☐ Qed nagħmel ir-rapport bħala xhud.

☐ Qed nagħmel ir-rapport bħala l-vittma.

2. Sena/Klassi: ______________________________________________________________________________

3. Ir-rapport qed isir minn:

☐ student

☐ membru tal-istaff

☐ ġenitur

☐ oħrajn: ______________________________

Taqsima 2: Dettalji tal-Inċident

4. Data tal-Inċident: ___________________________________________________________________________

5. Ħin tal-Inċident: _____________________________________________________________________________

6. Post tal-Inċident:

☐ Klassi

☐ Kuritur

☐ Tuckshop

☐ Playground

☐ Vann tal-iskola

☐ Online (midja soċjali, messaġġi, eċċ.)

☐ Oħrajn: ______________________________

7. Tip ta’ Bullying (immarka kull wieħed li japplika):

☐ Verbali (tgħajjir, ċajt li jweġġa’, theddid, twaqqigħ għaċ-ċajt)

☐ Fiżiku (daqqiet, bis-sieq, imbuttar)

☐ Soċjali/Relazzjonali (esklużjoni, tixrid ta’ xnigħat)

☐ Cyberbullying (fastidju online, messaġġi, sexting)

☐ Preġudizzjali (razza, ġeneru, orjentazzjoni sesswali, kultura, reliġjon, eċċ.)

☐ Sesswali (kummenti mhux xierqa, tmiss mhux xieraq, eċċ.)

☐ Intimidazzjoni/Estorsjoni

☐ Oħrajn: ______________________________

8. Deskrizzjoni tal-Inċident:
Jekk jogħġbok iddeskrivi x’ġara bl-aktar dettall possibbli. Inkludi l-ismijiet ta’ dawk involuti, x’intqal jew x’sar, u kwalunkwe dettall importanti ieħor.

_______________________________________________________________________________________________

_______________________________________________________________________________________________

_______________________________________________________________________________________________

_______________________________________________________________________________________________

_______________________________________________________________________________________________

_______________________________________________________________________________________________

_______________________________________________________________________________________________

_______________________________________________________________________________________________

Taqsima 3: Persuni Involuti

9. Persuna/persuni allegatament involuti fl-imġiba ta’ bullying: Isem/ismijiet (jekk magħrufa):

______________________________________________________________________________________________

10. Persuna/persuni allegatament fil-mira: Isem/ismijiet (jekk differenti minn min qed jagħmel ir-rapport):

______________________________________________________________________________________________

11. Xhieda/bystanders: Isem/ismijiet (jekk hemm): ___________________________________________________

______________________________________________________________________________________________

Taqsima 4: Impatt u Azzjoni Meħuda

12. L-inċident kif affettwa lilek jew lil oħrajn involuti? __________________________________________________

______________________________________________________________________________________________

13. Ħadt xi azzjoni dak il-ħin?

☐ Iva

☐ Le

Jekk iva, jekk jogħġbok iddeskrivi l-azzjoni li ttieħdet: ________________________________________________

14. Irrappurtajt dan l-inċident lil xi ħadd ieħor?

☐ Iva

☐ Le

Jekk iva, lil min? ______________________________________________________________________________

Taqsima 5: Follow-Up

15. Kif tixtieq li dan l-inċident jiġi riżolt? _________________________________________________________

16. Hemm xi mod kif tixtieq li l-iskola tagħtik appoġġ? Pereżempju, appoġġ mogħti minn:

☐ Guidance Teacher

☐ Counsellor tal-iskola

☐ għalliem

☐ oħrajn: ______________________________

Grazzi talli ħadt il-ħin biex tirrapporta dan l-inċident. Is-sigurtà u l-benesseri tiegħek huma importanti. Tittieħed aktar azzjoni skont il-ħtieġa.

Biex timtela mill-adult li qed jagħti appoġġ:

Politika Kontra l-Bullying tal-Iskola St Michael
Verżjoni għall-Istudenti

L-Impenn Tagħna

Fl-Iskola St Michael, nemmnu li kulħadd jistħoqqlu jħossu sigur u rispettat. Il-bullying ta’ kull tip mhuwiex aċċettabbli. Aħna qegħdin hawn biex nappoġġjawk jekk tħossok imweġġa’, eskluż jew mhux sigur. Flimkien nistgħu nagħmlu l-iskola tagħna post aħjar għal kulħadd.

X’inhu Bullying?

Il-bullying iseħħ meta xi ħadd jagħmel jew jgħid xi ħaġa li tweġġa’ apposta u dan jiġri aktar minn darba. Il-bullying huwa kull imġiba aggressiva mhux mixtieqa li tinvolvi żbilanċ ta’ poter. Jista’ jkun fiżiku, emozzjonali jew soċjali. Jista’ jieħu ħafna forom:

• Fiżiku: daqqiet, imbuttar jew ħsara lill-affarijiet ta’ ħaddieħor.
• Verbali: tgħajjir, ċajt li jweġġa’ jew theddid.
• Soċjali: tħalli lil xi ħadd barra apposta jew ixerred xnigħat.
• Cyberbullying: tibgħat messaġġi koroh online jew ittella’ affarijiet li jweġġgħu lil ħaddieħor.

Jekk taħseb li qed iseħħ bullying, aħna qegħdin hawn biex nisimgħuk u ngħinuk.

Kif Tirrapporta Bullying

Jekk tħoss li qed tkun ibbuljat jew tara lil xi ħadd jiġi bbuljat, tista’ tirrapporta dan. Tista’ tagħmel hekk:

1. Tkellem ma’ għalliem li tafda jew mal-Class Mentor tiegħek.

2. Ikkuntattja lid-Designated Safeguarding Officer (DSO), is-Sur Massimo Farrugia:

• personalment;
• permezz ta’ komunikazzjoni fuq il-pjattaforma diġitali tal-iskola
• billi tuża l-kaxxa anonima tar-rapporti.

Ir-rapporti kollha jittieħdu bis-serjetà u jiġu ttrattati malajr u b’kunfidenzjalità.

X’Jiġri Wara?

Meta tirrapporta bullying, nagħmlu dan li ġej:

1. Nisimgħu: Nisimgħu l-istorja tiegħek u niżguraw li tħossok sigur.

2. Ninvestigaw: L-għalliema u d-DSO jaraw is-sitwazzjoni billi jitkellmu ma’ dawk kollha involuti.

3. Nieħdu Azzjoni: Naħdmu biex il-bullying jieqaf:

• Nitkellmu ma’ min għamel il-bullying biex ngħinuh jifhem l-azzjonijiet tiegħu.
• Nagħtu appoġġ lill-vittma biex terġa’ tħossha sigura u kunfidenti.
• Ninfurmaw lill-ġenituri biex ikunu jistgħu jgħinu fid-dar.

4. Insegwu: Niċċekkjaw miegħek biex niżguraw li l-bullying waqaf u li tħossok sigur.

Kif Nipprevjenu l-Bullying?

Naħdmu bis-serjetà biex niżguraw li l-bullying ma jseħħx billi:

• norganizzaw taħditiet u attivitajiet dwar il-ġentilezza, il-ħlewwa ma’ kulħadd u l-inklużjoni;
• il-Mentors jiċċekkjaw regolarment mal-istudenti biex jaraw li kulħadd ikun tajjeb;
• noffru spazji siguri waqt il-ħin tal-mistrieħ fejn l-istudenti jistgħu jħossuhom appoġġjati;
• ninkoraġġixxu u nsaħħu klabbs biex jinbnew ħbiberiji ġodda.

X’Jiġri lil Min Jagħmel il-Bullying?

Aħna niffukaw fuq li ngħinu lil min ikun għamel il-bullying jifhem l-azzjonijiet tiegħu u jbiddel l-imġiba tiegħu. Madankollu, jekk il-bullying ikun serju ħafna, jista’ jkun li:

• jingħata ftehim dwar l-imġiba;
• jiġi riferut lill-Kap tal-Iskola jew lill-Bord tad-Diretturi;
• jiġi sospiż mill-iskola jekk ikun meħtieġ.

Ir-Rwol Tiegħek

• Kun Ġentili: Ittratta lil ħaddieħor b’rispett u b’qalb tajba.
• Tkellem: Jekk tara bullying, tinjorahx. Irrapportah.
• Appoġġja lil Sħabek: Għin biex noħolqu ambjent sigur għal kulħadd.

Flimkien Nistgħu Nagħmlu Differenza

Għandna bżonn l-għajnuna tiegħek biex nagħmlu l-Iskola St Michael post sigur u sabiħ għal kulħadd. Kun ġentili, inkludi lil ħaddieħor u tkellem jekk tħoss li xi ħaġa mhix sew. Aħna qegħdin hawn biex nisimgħuk u nappoġġjawk f’kull pass.

Proċess ta’ Rapportar

Pass 1: Irrapporta

• Tkellem ma’ għalliem, mal-Class Mentor jew mas-Sur Massimo Farrugia (DSO).
• Ibgħat rapport b’mod diġitali (Email, MySchool,)
• Uża l-kaxxa anonima tar-rapporti.
• Tkellem mal-ġenituri biex jikkuntattjaw lill-iskola

Pass 2: Investigazzjoni

• L-għalliema u d-DSO jinvestigaw billi jitkellmu ma’ dawk kollha involuti.

Pass 3: Azzjoni

• Inwaqqfu l-bullying.
• Nappoġġjaw lill-vittma.
• Ngħinu lil min għamel il-bullying jibdel l-imġiba tiegħu.

Pass 4: Follow-Up

• Niżguraw li l-bullying waqaf.
• Niċċekkjaw ma’ dawk kollha involuti biex niżguraw li jħossuhom siguri.

Flimkien nistgħu nagħmlu l-Iskola St Michael post fejn kulħadd iħossu apprezzat u sigur.

Ftakar:

• M’intix waħdek!
• Tkellem u aħna nisimgħuk.
• Nistgħu ngħinuk issib soluzzjoni!